06:46 م
الخميس 21 نوفمبر 2024
كتب – محمد القرش:
شهدت الساعات القليلة الماضية أزمة في مباراة الأهلي وإنبي للسيدات، بعد إلغائها واحتساب المارد الأحمر فائزا بنتيجة 2-0، بسبب عدم توفر سيارة إسعاف للمباراة.
وقال أيمن الشريعي رئيس نادي إنبي في تصريحات خاصة “لمصراوي”: “عدم وجود عربة الإسعاف كان خطأ من إداري فريقنا، وتم تحويله للتحقيق فورا بسبب عدم تذكره دفع رسوم السيارة”.
وردا على تصريحات شادي محمد، أوضح: “ياريت كابتن شادي يخليه في ثغرات الكورة ويبعد عن الثغرات الإدارية لأنه ميعرفهاش اصلا”.
وأضاف: “عيب لما حد بقيمة كابتن شادي محمد يقول إنبي جاب عربية إسعاف وخباها، لأنها بتيجي بفلوس وإيصال، ولو شادي (الجامد) كلف نفسه وكلم هيئة الإسعاف هيعرف أن الرسوم مدفعتش، يبقى عربية الإسعاف جت إزاي؟”.
وواصل: “ياريت شادي يخليه في الكورة ويسيب الثغرات الإدارية ديه لينا، إدارة الأهلي قوية جدا وبنتعلم منها، مينفعش حد منتمي ليهم يقول كلام مش مظبوط”.
وأردف: “احنا عشان نادي محترف ونفهم في الشغل الإداري المظبوط، لما عرفنا اللي حصل حولنا الإداري للتحقيق، جرينا جبنا سيارة إسعاف الشركة، لكن كان الوقت المسموح انتهى”.
وشدد: “عربية الإسعاف اللي شافها كابتن شادي مكتوب عليها من تحت إنبي، هل هيئة الإسعاف بتكتب إنبي؟”.
وعن تصريح شادي (اللي خايف من الأهلي مينزلش من بيته)، رد الشريعي: “ده كلام غير مقبول، ولا يصح حد بقيمة كابتن شادي أحد الأفراد التابعين للنادي الأهلي صاحب الخبرات الكبيرة يقول كدا”.
واختتم رئيس نادي إنبي: “الكلام ده ممكن اقبله من حد بينظم دورة رمضانية عشان (يكسب كحك العيد آخر الدورة)، كدا فيه لخبطة بين الدورة الرمضانية والدوري المصري، وانت كدا بتشكك فيه هيئة الإسعاف”.
اقرأ أيضًا:
شادي محمد: “إسعاف مباراة إنبي تمثيلية.. واللي خايف يواجه الأهلي مينزلش من بيته”
تعثر سيدات وادي دجلة في الدوري المصري بالتعادل مع مودرن سبورت
